Лінкі ўнівэрсальнага доступу

Як? Хочаш зьмяніць сьвет, пачні з сябе…


Сяргей Дубавец на сустрэчы з чытачамі.
Прэзэнтуючы ў Горадні кнігу “Як?” з бібліятэкі “Свабоды” аўтар Сяргей Дубавец зазначыў, што паставіў у ёй толькі пытаньні, але не імкнуўся даць на іх адказы. Настойлівым чытачам, якія ўсё ж дамагаліся адказу, аўтар параіў зьмяняць сьвет пачынаючы з сябе.

Сустрэча з літаратарам, крытыкам і выдаўцом, сталым аўтарам “Свабоды” Сяргеем Дубаўцом адбывалася ў памяшканьні Таварыства беларускай мовы. Як заўсёды тут было шматлюдна.

Сяргей Дубавец адпачатку распавёў пра што ён напісаў: “Я напісаў кніжку пра сучасную этыку. Сёньня пра гэта гавораць мала, маральных пытаньняў ніхто не падымае, тым ня менш мы бачым нямала людзкіх сутыкненьняў, сутыкненьняў розных інтарэсаў, розных супольнасьцяў, у тым ліку і ў палітыцы. І ўвесь час з гэтага выпадае этычны момант”.

Аўтар распавёў, што ўсю кніжку склаў толькі з пытаньняў на падставе свайго досьведу і ня даў на іх адказаў. Але, на яго думку, галоўнае, каб любыя адносіны, нават апазыцыі з уладай, складаліся з маральных і этычных пачаткаў.

Пытаньняў да аўтара было шмат і датычылі яны болей нават не літаратуры, а сучасных палітычных, грамадзкіх працэсаў, якія адбываюцца ў Беларусі, адносін апазыцыі і ўлады ў кантэксьце менавіта маралі і этыкі.

На сустрэчы было шматлюдна
Найбольш настойлівым чытачам аўтар давёў усё ж — як перамагаць…

Дубавец: “Як перамагаць? Трэба ў першую чаргу перагледзяць сябе. Гэта не пытаньне бою, а хутчэй самаарганізацыі, самаацэнкі”.

Пасьля сустрэчы я пацікавіўся ў некаторых чытачоў — ці падзяляюць яны погляды Сяргея Дубаўца?

Спадар Віктар: “Надта маралізавацца з цяперашняй уладай, на маю думку, усё ж ня сьлед”.

Спадар Андрэй: “Аўтар, з аднаго боку, правільна гаворыць, што апазыцыя стварае шмат бясплодных канфліктаў з уладай. Але зь іншага боку, калі казаць пра Гарадзеншчыну, то ніякія спробы дамовіцца з уладай нават па самых банальных пытаньнях не атрымоўваюцца. Таму гэта развага аўтара здаецца трохі рытарычнай”.

Глядзець камэнтары (4)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG