Лінкі ўнівэрсальнага доступу

Старыкевіч: “Каб паслухаць дзяжурныя рэчы, ня варта было запрашаць у Маскву”


Аляксандар Старыкевіч

Як ў беларускім журналісцкім асяродку ўспрынялі беспрэцэдэнтны дэсант у Крэмль прадстаўнікоў у тым ліку незалежных выданьняў? Вось што на гэты конт гаворыць галоўны рэдактар інтэрнэт-газэты “Салідарнасьць” Аляксандар Старыкевіч.

“Фармальна гэтая падзея аказалася больш цікавая, чым зьмястоўная. Канечне, тое, што кіраўнік суседняй дзяржавы запрашае журналістаў на адмысловую прэс-канфэрэнцыю, — гэта падзея. Аднак з таго, што было сказана Мядзьведзевым, мала што вынікае. І ў тым ліку сэнс гэтага мерапрыемства застаецца ня надта зразумелым. Так, паказалі дулю Лукашэнку, бо, натуральна, яму ня вельмі спадабаецца наўпроставая размова расейскага прэзыдэнта зь беларускімі СМІ, у тым ліку і незалежнымі.

Яшчэ можна адзначыць, што Мядзьведзеў зусім не двухсэнсоўна даў зразумець: ніякіх канфліктаў паміж ім і Лукашэнкам не існуе і спрабаваць убіць клін бессэнсоўна. Але, з майго гледзішча, неяк драбнавата для такой імпрэзы. І чаго ў прынцыпе хацеў дасягнуць Крэмль, склікаючы гэтую прэс-канфэрэнцыю, пакуль што ёсьць загадкай”.

Карэспандэнт: “Мядзьведзеў сказаў, што такія сустрэчы могуць быць рэгулярнымі і нават наконт магчымых кантактаў з апазыцыйнымі беларускімі палітыкамі выказаўся загадкава: “А чаму б і не?”

“Яно так. Але, уласна кажучы, Мядзьведзеў спаслаўся на лукашэнкаўскі досьвед. Аляксандар Рыгоравіч, як вядома, ужо даўно штогод ладзіць буйное прапагандысцкае шоў для расейскіх СМІ. Аднак я ўсё ж чакаў чагосьці больш зьмястоўнага, калі хочаце, больш цікавага ад прэзыдэнта Расеі, нейкіх ягоных заяваў на гэтай прэсавай канфэрэнцыі. Але атрымалася ўсё досыць дзяжурна, і каб агучыць усе гэтыя рэчы, на маю думку, не абавязкова было запрашаць беларускіх журналістаў у Маскву. Чаго тут шукаў Крэмль, акрамя таго, каб пагуляць на нэрвах Аляксандра Лукашэнкі, асабіста мне ня надта зразумела”.

Глядзець камэнтары (5)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG