Лінкі ўнівэрсальнага доступу

Судзяць фігуранта «Справы патрыётаў» Андрэя Бяляўскага за патрон — пракурор патрабуе 1 год абмежаваньня волі

Суд Ленінскага раёну Менску разглядае крымінальную справу менскага мастака-дызайнэра Андрэя Бяляўскага.


Андрэй Бяляўскі ў судзе

Коратка

Андрэя Бяляўскага судзяць за захоўваньне аднаго патрона ад аўтамата Калашнікава, які быў знойдзены сярод рэчаў Бяляўскага падчас ператрусу пасьля ягонага затрыманьня ў сакавіку 2017 году ў так званай «справе патрыётаў».

Бяляўскі паведаміў, што захоўваў патрон у якасьці сувэніру і прызнаў сваю віну ў захоўваньні патрону.

12 сьнежня Сьледчы камітэт прад’явіў абвінавачаньне Бяляўскаму паводле ч. 1 артыкулу 295 Крымінальнага кодэксу Беларусі «Незаконныя выраб, набыцьцё, перадача ў валоданьне, збыт, захоўваньне, перавозка, перасылка або нашэньне агнястрэльнай зброі, боепрыпасаў, выбуховых рэчываў».

14:50 11.1.2018

Бяляўскі: пракуратура хоча патрымаць мяне год на «кручку»

Падсудны Андрэй Бяляўскі пракамэнтаваў Свабодзе пакараньне, якое патрабуе для яго пракурор на працэсе:

«Канешне, гэта не зьняволеньне, але трэба ўлічваць беларускі досьвед, калі такія прысуды потым заканчваліся рэальным тэрмінам, як у той жа справе Паліенкі. То бок бачна, што пракуратура хоча патрымаць мяне год на „кручку“. Яшчэ трэба параўнаць маю справу са справай француза, якога за той жа патрон увогуле апраўдалі. Чаму тады мяне хочуць за яго ўсё ж пакараць? Але паглядзім яшчэ, што скажа суд. Спадзяюся, прысуд будзе іншым».

14:49 11.1.2018

Адвакат Мушынскі мяркуе, што прысуд будзе такім, як прасіў пракурор — 1 год без накіраваньня ў месца зьняволеньня. «Улічваючы асобу судзьдзі, я ня думаю, што яна абмяжуецца штрафам».

14:32 11.1.2018

Прысуд будзе 12 студзеня

Судзьдзя абвясьціла, што прысуд будзе агучаны заўтра ў 9.30.

14:31 11.1.2018

Кароткае апошняе слова

Апошняе слова Бяляўскага вельмі кароткае: «Я ўсьвядоміў свае дзеяньні і раскайваюся».

14:31 11.1.2018

Адвакат просіць мінімальны штраф

«Суд можа ўжыць 70 артыкул Крымінальнага кодэксу і абраць самае мяккае пакараньне», — мяркуе адвакат Мушынскі. Ён дадае, што і матыву на злачынства ў Бяляўскага не было, просіць улічыць ягоную добрую характарыстыку і тое, што ён не зьдзяйсьняў раней злачынстваў. Просіць прызначыць мінімальны штраф.

14:30 11.1.2018

Адвакат: дзеяньні падабароннага нязначныя

Адвакат Вадзім Мушынскі адзначае, што справа нібыта простая, але яна ўсё ж паказальная, бо судзяць маладога чалавека, які не зрабіў ніякага злачынства, а патрон захоўваў як сувэнір. Адвакат сумняецца, што будзе справядлівым нават тое пакараньне, якое просіць для Бяляўскага пракурор.

«На жаль, заканадаўца ня вызначыў для гэтага артыкулу дакладную колькасьць боепрыпасаў, а ад гэтага шмат што залежыць. Адзін патрон бяз зброі ня носіць ніякай пагрозы, — мяркуе Мушынскі.— Нават кухонныя нажы больш небясьпечныя, але за іх ніякай адказнасьці не прадугледжана».

Мушынскі заклікае суд прызнаць дзеяньні падабароннага нязначнымі.

14:19 11.1.2018

Пракурор просіць 1 год абмежаваньня волі

Пракурор Аляксей Кісьляк кажа, што Бяляўскі прызнаў сваю віну і пераказвае абставіны справы. Мяркуе, што віна была даказаная цалкам у судзе і на сьледзтве.

Пракурор распавядае, што Бяляўскаму паставілі ў віну такую кваліфікацыйную рысу злачынства як перавозка патрона, але Бяляўскі на судзе гэта не пацьвердзіў і гэта не было даказана. Таму пракурор просіць выключыць гэтую прыкмету з абвінавачаньня.

Пракурор характарызуе Бяляўскага станоўча. Просіць пакараць яго паводле часткі 2 артыкулу 295 — гэта цяжкае злачынства, але пракурор адзначае змягчальныя абставіны. Таму лічыць, што можна абраць пакараньне, не зьвязанае з пазбаўленьнем волі, — просіць для Бяляўскага 1 год абмежаваньня волі без накіраваньня ў месцы пазбаўленьня волі і без канфіскацыі маёмасьці.

14:12 11.1.2018

Працэс затрымліваецца

На працэс прыйшоў праваабаронца зь «Вясны» Валянцін Стэфановіч. Паводле яго, калі прысуд будзе відавочна непрапарцыйным, Андрэя Бяляўскага праваабаронцы прызнаюць палітвязьнем.

Сакратарка паведаміла, што «па тэхнічных прычынах» паседжаньне затрымліваецца, пачнецца недзе а 14.30.

11:08 11.1.2018

Сябры Бяляўскага спадзяюцца на мяккі прысуд

Андрэй Бяляўскі перад судом казаў карэспандэнту Свабоды, што прыкладна гэтак і будзе, бо ня мае намеру зацягваць працэс і прызнае віну цалкам.

Андрэй Бяляўскі
Андрэй Бяляўскі

«Згодны на што заўгодна, але спадзяюся, што пакараньне ня будзе зьвязана з абмежаваньнем волі. Было б ідэальна, каб суд абмежаваўся ў прысудзе тым тэрмінам, які я ўжо адседзеў падчас сьледзтва па справе „Белага легіёну“ — гэта 2,5 месяцы», — сказаў Бяляўскі.

Яшчэ дадаў, што ўсё адбываецца досыць фармальна, і ён нават не ўяўляе, хто з кім будзе спрачацца на судовых спрэчках. «Відаць, проста гэтак трэба паводле працэсуальнага закону, ня больш».

Сябра падсуднага Міраслаў Лазоўскі мяркуе, што будзе «лёгкі» варыянт прысуду. «Могуць даць умоўнае пакараньне ці такое, каб пакрыла той тэрмін, які Андрэй ужо адбыў».

11:04 11.1.2018

У суд прыйшлі іншыя фігуранты «Справы патрыётаў» — Міраслаў Лазоўскі і Віктар Данілаў, каб падтрымаць сябра.

Міраслаў Лазоўскі
Міраслаў Лазоўскі
Віктар Данілаў
Віктар Данілаў

11:00 11.1.2018

Суд доўжыўся 25 хвілін. Перапынак да 14.00

Судзьдзя скончыла зачытваньне дакумэнтаў справы, удакладніла ў Бяляўскага, дзе ён знаходзіўся на момант ператрусу. Той адказаў, што пад вартай.

Судзьдзя абвясьціла, што судовае сьледзтва скончанае і абвясьціла перапынак да 14 гадзін, тады пачнуцца судовыя спрэчкі.

10:55 11.1.2018

«Удзелу ў грамадзкім жыцьці раёну не прымаў», — даведка зь міліцыі

Зачытваецца характарыстка на Бяляўскага ад участковага міліцыянта, што той «здавальняюча» сябе паводзіў, скаргаў на яго не было, на ўліку не стаіць.

Паводле банку дадзеных МУС з 2011 па 2014 гады прыцягваўся да адміністрацыйнай адказнасьці за парушэньне правілаў дарожнага руху.

10:52 11.1.2018

Маці падсуднага адмовілася сьведчыць на працэсе

Сьведка Тацяна Філімонава, маці Андрэя Бяляўскага, адмовілася даваць паказаньні супраць сына, яна пагадзілася казаць тое, што «будзе яму на карысьць», але судзьдзя адказала на гэта, што невядома, як там будзе.

Судзьдзя магла прапанаваць маці як сьведцы даваць паказаньні толькі ў частцы «характарыстыкі сына як чалавека» — гэтак было на працэсе «Рэгнума», але не зрабіла так. У выніку маці Бяляўскага зусім адмовілася ад паказаньняў.

10:51 11.1.2018

Пытаньні да падсуднага скончыліся

Судзьдзя спытала: «Вы кажаце сёньня, што ня ведалі, ці патрон прыдатны да стральбы, але на сьледзтве вы казалі, што аглядалі патрон і меркавалі, што ён прыдатны. Давалі такія паказаньні?»

Бяляўскі пагадзіўся, што казаў гэтак, але сказаў, што меркаваў, але дакладна ня ведаў. У войску ён не служыў і вонкава ня мог ацаніць, ці прыдатны патрон да стральбы. Яшчэ раз паўтарыў, што раскайваецца. Пытаньні скончыліся. Запрасілі на допыт сьведак.

10:43 11.1.2018

Пракурор скончыў допыт

Пракурор скончыў задаваць пытаньні. Цяпер пытаньні задае адвакат, удакладняе, ці памятаў падсудны пра патрон? Бяляўскі адказвае, што зусім пра яго забыў і хутчэй за ўсё выкінуў бы, калі б пра яго згадаў.

10:41 11.1.2018

Гэта сувэнір

Андрэй Бяляўскі
Андрэй Бяляўскі

Падсудны сказаў, што вырашыў захаваць патрон як сувэнір і паклаў у шуфляду стала.

«Адтуль не даставаў, ён увесь час там валяўся». Гэта было ў 2013 годзе і з таго часу, да ператрусу ў 2017-м, ён патрон з шуфляды не забіраў.

10:39 11.1.2018

Пачаўся допыт Бяляўскага

Падсудны пагадзіўся даваць паказаньні. Паведаміў, што набыў у Рэчыцы аўтамабіль «Гранд-чэрокі» і ў ім знайшоў гэты патрон. Распавядае дэталі.

10:37 11.1.2018

Бяляўскі прызнаў сябе вінаватым

Паводле сьледзтва, Бяляўскі спачатку захоўваў патрон у аўтамабілі, потым адвёз яго дамоў, дзе захоўваў, што было злачынствам. Бяляўскі заявіў, што цалкам прызнае сябе вінаватым.

10:35 11.1.2018

Зачытваюць абвінавачваньне

Пракурор пачаў зачытваць абвінавачваньне: «Сьледзтвам высьветлена, што Бяляўскі ў нявызначаны час ў нявызначаным месцы ....» знайшоў патрон да аўтамата Калашнікава.

10:33 11.1.2018

Cудзьдзя — Марына Запасьнік. Абараняе Бяляўскага адвакат Вадзім Мушынскі.

Адвакат Вадзім Мушынскі
Адвакат Вадзім Мушынскі

Загрузіць яшчэ

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG