Лінкі ўнівэрсальнага доступу

Зяленскі адказаў на заявы Пуціна пра «адзін народ» і «вонкавае кіраваньне» Ўкраінай


«Калі б мы былі адным народам, то ў Маскве, хутчэй за ўсё, хадзілі б грыўні, а над Дзярждумай лунаў бы жоўта-блакітны сьцяг», — сказаў Зяленскі

Прэзыдэнт Украіны Ўладзімір Зяленскі заявіў, што ўкраінцы і расейцы «дакладна не адзін народ». Пра гэта ён заявіў у інтэрвію агенцтву «Інтэрфакс-Украіна», апублікаваным 1 ліпеня, камэнтуючы ўчорашнія заявы прэзыдэнта Расеі Ўладзіміра Пуціна.

«Давайце нарэшце расставім кропкі над „i“. Мы дакладна не адзін народ. Так, у нас шмат агульнага. У нас агульная частка гісторыі, памяць, суседзтва, сваякі, агульная перамога над фашызмам і агульныя трагедыі... Але мы, паўтару яшчэ раз, не адзін народ. Калі б мы былі адным народам, то ў Маскве, хутчэй за ўсё, хадзілі б грыўні, а над Дзярждумай лунаў бы жоўта-блакітны сьцяг. Таму дакладна не адзін народ. У кожнага з нас свой шлях», — сказаў Зяленскі.

Паводле яго, ва ўкраінцаў і расейцаў мусіць быць адна мэта — скончыць вайну на Данбасе, вярнуць Украіне яе тэрыторыі. «І яшчэ нешта — немагчыма адначасова гаварыць пра „адзін народ“ і адкрыта захопліваць нашы тэрыторыі і працягваць бойню на Данбасе. Гэта ж відавочна», — дадаў ён.

Зяленскі таксама заявіў, што тэза Пуціна пра «вонкавае кіраваньне» — гэта «выключна прапагандысцкая мантра» для ўнутранага спажыўца ў самой Расеі.

«Бо ў рэальным сьвеце ўсе пытаньні, якія тычацца Ўкраіны, вырашаюцца выключна ва Ўкраіне і ўкраінскай дзяржавай, а дакладна ня ў нейкай суседняй краіне і дакладна не „ценявымі пасярэднікамі“, якія цяпер пад хатнім арыштам або ў вышуку», — сказаў украінскі прэзыдэнт.

Паводле яго, нядаўні саміт ЗША — Расея паказаў, што пытаньні Ўкраіны не вырашаюцца «нават у фармаце непасрэднай камунікацыі» амэрыканскага і расейскага прэзыдэнтаў.

«У нас у краіне, дарэчы, вельмі папулярная фраза „нічога пра Ўкраіну без Украіны“. Менавіта так цяпер і працуе наша дзяржава. Падзеі, якія адбываюцца на глябальным палітычным рынку, толькі пацьвярджаюць гэта. Больш за тое, ужо 12 ліпеня адбудзецца мая асабістая сустрэча з канцлеркай Нямеччыны Ангелай Мэркель. У канцы ліпеня будуць непасрэдныя перамовы з прэзыдэнтам ЗША Джо Байдэнам», — сказаў Зяленскі.

Прэзыдэнт Украіны пацьвердзіў, што гатовы сустрэцца з прэзыдэнтам Расеі, «калі ён сапраўды зацікаўлены ў вырашэньні шэрагу крызісных пытаньняў, якія аб’ектыўна існуюць у двухбаковых дачыненьнях Украіны і Расеі».

«У любым выпадку падрыхтоўка да гэтага няпростага матчу працягваецца», — дадаў ён.

Напярэдадні падчас «прамой лініі» прэзыдэнт Расеі Ўладзімір Пуцін заявіў, што ня лічыць украінскі народ «непрыязным», аднак лічыць такім кіраўніцтва Ўкраіны.

Пуцін зазначыў, што ва Ўкраіне, як і ў Расеі, дастаткова «вузкалобых людзей», якія «руйнуюць краіну», у прыватнасьці, заціскаючы апазыцыю. У прыватнасьці, ён заявіў пра несправядлівы перасьлед прарасейскага палітыка, свайго кума Віктар Медзведчука, якога Пуцін назваў «украінскім нацыяналістам».

Прэзыдэнт Расеі дадаў, што не адмаўляецца ад ідэі сустрэцца з прэзыдэнтам Украіны Уладзімірам Зяленскім, але заявіў, што «спачатку трэба зразумець, пра што гаварыць». Пуцін заявіў, што ключавыя ўкраінскія пытаньні вырашаюцца «ня ў Кіеве, а ў Вашынгтоне, часткова ў Бэрліне і Парыжы».

Пазьней міністар замежных справаў Украіны Дзьмітры Кулеба адрэагаваў у твітэры на словы Пуціна.

«Калі Пуцін заводзіць старую песьню пра „вонкавае кіраваньне“, гэта азначае толькі адно: ён марыць, каб пытаньні Ўкраіны вырашаліся ў Маскве. Пазыцыя прэзыдэнта Зяленскага і воля ўкраінскага народу выразная: гэта наша краіна, і ніхто ня будзе вырашаць наш лёс, акрамя нас саміх», — падкрэсьліў міністар.

У гэтым месяцы прэзыдэнт Украіны Ўладзімір Зяленскі заявіў, што магчымасьць яго сустрэчы з прэзыдэнтам Расеі Уладзімірам Пуціным «занадта адцягвае» расейскі бок.

«Яны ўздымаюць пытаньні расейскай мовы, царквы і гэтак далей. Нават у сродках масавай інфармацыі абмяркоўваюць маю фігуру — гэта вельмі „важна“ ў двухбаковых дачыненьнях, калі ідзе вайна...», — заявіў Уладзімір Зяленскі.

Ён зазначыў, што расейскі бок апэлюе да Ўкраіны ня тымі пытаньняхмі, якія павінны быць галоўнымі.

Раней прэзыдэнт Украіны Ўладзімір Зяленскі наконт непасрэднай сустрэчы з прэзыдэнтам Расеі Ўладзімірам Пуціным заявіў, што бакі павінны сустрэцца «або ў адным зь месцаў канфлікту, або на нэўтральнай тэрыторыі», а не ў Маскве, як прапануе Крэмль.

Ён запрасіў прэзыдэнта Расеі сустрэцца на Данбасе, а Пуцін заявіў, што гатовы сустрэцца ў Маскве. Пазьней Зяленскі заявіў, што падрыхтоўка да яго сустрэчы з Пуціным працягваецца. Пры гэтым ён дадаў, што мае значэньне зьмест размовы, а ня месца, дзе яе праводзіць. Прэс-сакратар Крамля Дзьмітры Пяскоў казаў, што Пуцін можа абмяркоўваць са сваім украінскім калегам пытаньні двухбаковых дачыненьняў, але не сытуацыю на Данбасе.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG