Лінкі ўнівэрсальнага доступу

Палітвязень Віктар Царыкевіч выйшаў на волю


Віктар Царыкевіч

Жыхар Мастоў адбыў прысуджаны яму тэрмін — год калёніі за пудзілы міліцыянтаў і імправізаваныя труны для іх.

Віктар Царыкевіч адседзеў у калёніі ўвесь тэрмін і выйшаў на волю 22 жніўня, паведаміў праваабарончы цэнтар «Вясна».

Мужчыну прызналі вінаватым па шэрагу артыкулаў Крымінальнага кодэксу за правядзеньне сэрый «цынічных акцый» у верасьні-кастрычніку 2020 году: размалёўваньне прыпынкаў у Мастоўскім раёне, нанясеньні на дрэвах БЧБ-сьцягоў, разьвешваньні на іх пудзілаў у міліцэйскай форме і разьмяшчэньні таблічак у выглядзе рытуальных надмагільляў, а таксама труны з пудзілам у форме міліцыянта.

У пачатку чэрвеня адна з маці палітвязьняў, якіх утрымлівалі ў віцебскай калёніі «Віцьба-3», паведаміла, што за краты прыйшла прапанова падпісаць прашэньне на памілаваньне на імя Лукашэнкі. Хто менавіта з 11 палітвязьняў, якія сядзелі ў гэтай калёніі на той момант, падпісаў прашэньне, невядома.

З турмы Віктар Царыкевіч 6 красавіка даслаў Дзянісу Турчанку ліст са словамі: «Дачка пасьля жнівеньскіх рэпрэсій неяк сказала: „Тата, я 11 год з табой жыву і ніколі ня бачыла, каб ты нечага баяўся“. Пасьля такіх словаў я ня мог збочыць са шляху да мэты. Я ведаў, якім коштам магу разьлічыцца за нашу праўду, і не шкадую».

27 студзеня 2021 году справу Царыкевіча разглядаў старшыня суду Мастоўскага раёну Віталь Сініла. Працэс праходзіў фактычна ў закрытым рэжыме з фармальнай прычынай праз эпідэміялягічную сытуацыю. Акрамя году пазбаўленьня волі, Царыкевіч пазбавіўся і аўтамабіля — яго канфіскавалі як «сродак зьдзяйсьненьня злачынства».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG