Лінкі ўнівэрсальнага доступу

У Беларусі зафіксавалі новы від птушак — арлана-даўгахвоста


Арлан-даўгахвост

Від знаходзіцца пад пагрозай зьнікненьня. Птушка жыве ў Азіі, а ў Беларусі яе пабачылі ўпершыню.

Новы від для Беларусі — арлан-даўгахвост (Haliaeetus leucoryphus) — адзначаны пад Менскам на рыбгасе «Волма». Маладая птушка прыляцела ў краіну з Азіі, піша «Ахова птушак Бацькаўшчыны».

Новы для краіны від зафіксавалі назіральнікі Андрэй Барадзін, Аляксандра Кудзінава, Сяргей Анохін, Дар’я Ўруціна, Кацярына і Аляксандар Варабʼёвы.

Арланы-даўгахвосты гняздуюць у Індыі і Пакістане, пасьля размнажэньня пералятаюць на поўнач, а з траўня зьяўляюцца на вадаёмах Сярэдняй Азіі і крыху на поўнач ад яе ў пошуках ежы. Да восені, пачатку пэрыяду размнажэньня, яны зноў мігруюць на поўдзень.

Чаму рэгістрацыя арлана-даўгахвоста ў Беларусі — сэнсацыя?

Від, які жыве на поўдзень ад Гімалаяў, складана спаткаць па-за межамі гнездавога арэалу нават у Азіі. А ў выпадку Беларусі арлан зьдзейсьніў вандроўку даўжынёй сама меней 5 тысяч кілямэтраў.

Арлан-даўгахвост знаходзіцца на мяжы зьнікненьня. Колькасьць птушак асабліва зьнізілася ў другой палове ХХ ст., прычыны дакладна ня вызначаныя. Гэта адзіная птушка паўночнага паўшар'я (прынамсі драпежная), якая размнажаецца на поўдні свайго арэалу ўзімку і мігруе на поўнач на летні пэрыяд.

Вядомыя толькі адзінкавыя сустрэчы арланаў-даўгахвостаў у суседніх Расеі, Украіне і Польшчы. У Беларусі ён упершыню.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG