Лінкі ўнівэрсальнага доступу

Васкрасенскі хоча хадайнічаць аб вызваленьні Пачобута, хоць той адмовіўся прасіць памілаваньня


Плякат у падтрымку Анджэя Пачобута ў цэнтры Варшавы.

Палітвязьню Анджэю Пачобуту, зьняволенаму ў рамках так званай «польскай справы», прыйшлі ўжо тры лісты ад Юрыя Васкрасенскага.

Свабодзе стала вядома, што ў апошнім лісьце Анджэю Пачобуту Юры Васкрасенскі напісаў, што мае намер прадстаўляць ягоныя інтарэсы і прасіць аб вызваленьні.

Зьняволены журналіст раней адмовіўся пісаць прашэньне аб памілаваньні. Ён адзначыў, што нікому не даваў паўнамоцтваў прадстаўляць свае інтарэсы ў пытаньні памілаваньня.

Юры Васкрасенскі, вызвалены зь СІЗА пасьля сустрэчы з Лукашэнкам, быў ухвалены ўладамі як «пасярэднік» для дыялёгу з апазыцыяй, ён стварыў «Круглы стол дэмакратычных сілаў» і склаў два сьпісы: на амністыю і на памілаваньне. Першы сьпіс, на амністыю, уключае 650 чалавек.

Журналіста і сябра Рады Саюзу палякаў Анджэя Пачобута затрымалі 25 сакавіка, ён у Жодзінскай турме. Таксама ў сакавіку затрымалі яшчэ трох актывістак польскай дыяспары і старшыню арганізацыі Анжаліку Борыс. Ім закідаюць «распальваньне нацыянальнай варожасьці» і «рэабілітацыю нацызму».

Пазьней стала вядома, што Анджэй Пачобут і Анжаліка Борыс адмовіліся ад вызваленьня ў абмен на згоду пакінуць радзіму. У той жа час іншыя актывісткі — Ірэна Бярнацкая, Марыя Цішкоўская і Ганна Панішава — гэтай магчымасьцю скарысталіся, іх без дакумэнтаў вывезьлі ў Польшчу.

Хто такі Анджэй Пачобут

  • Анджэй Пачобут — вядомы журналіст і грамадзкі дзеяч, сябра незарэгістраванага Саюзу палякаў Беларусі.
  • Нарадзіўся 17 красавіка 1973 году ў Вялікай Бераставіцы (Горадзенская вобласьць). Яму 48 гадоў. Жыве ў Горадні. Жанаты, двое дзяцей: старэйшая дачка вучыцца ў Горадні ў мэдычным унівэрсытэце, малодшы сын ходзіць у школу.
  • У 2002 годзе прыйшоў у журналістыку. Працаваў у першых незалежных горадзенскіх газэтах «Пагоня», «Дзень», «Мясцовы час», рэспубліканскай газэце «Народная воля», газэце СПБ на польскай мове Głos znad Niemna («Голас з-над Нёману»). Быў рэдактарам часопіса СПБ Magazyn Polski na uchodźstwie, карэспандэнтам буйнога польскага выданьня Gazeta Wyborcza. Займаўся тэмамі, зьвязанымі з гісторый спэцслужбаў СССР, антысавецкага супраціву ў Заходняй Беларусі, Арміяй Краёвай.
  • 25 сакавіка 2021 году Андрэя Пачобута затрымалі, прыйшоўшы да яго зь ператрусам.
  • Пачобут праходзіць па «польскай справе». Генэральная пракуратура завяла гэтую справу «за распальваньне рэлігійнай і нацыянальнай варожасьці» (частка 3 артыкула 130 КК) супраць старшыні Саюзу палякаў Беларусі Анжалікі Борыс і іншых асобаў. Пачобуту пагражае да 12 гадоў калёніі.
  • Трох фігурантак «польскай справы» Ірэну Бярнацкую, Марыю Цішкоўскую і Ганну Панішаву сёлета ў траўні вызвалілі ўзамен на выезд зь Беларусі. Пачобут адмовіўся ад такой прапановы. За кратамі па гэтай справе застаецца ён і Анжаліка Борыс.
  • Цяпер Пачобут у жодзінскім СІЗА.
  • У Анджэя хворае сэрца. Раней, асабліва ў сьпёку, у яго часта здараліся прыступы, ён слабеў, клаўся ў шпіталь праз парушаны рытм сэрца.
  • Сёлета ў чэрвені-ліпені ён у цяжкай форме, зь ягоных словаў, перахварэў у турме на каранавірус, дыягназ пацьвердзілі турэмныя мэдыкі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG