Лінкі ўнівэрсальнага доступу

ТБМ пакідае менскую сядзібу, якую займала 30 гадоў, і ладзіць разьвітальную талаку


Адна з імпрэзаў у сядзібе ТБМ, архіўнае фота

Кіраўніцва Таварыства беларускай мовы імя Францішка Скарыны запрашае на талаку, каб пасьля ліквідацыі арганізацыі дапамагчы вызваліць памяшканьне сядзібы ў Менску.

«Дзеля таго, каб вызваліць усё з нашай сядзібы, мы арганізоўваем у суботу 27 лістапада талаку (пачатак а 12-й). Кожны зможа забраць на памяць якую-небудзь рэч — напрыклад, кнігу ці газэту. Шмат што будзе вывезена для захаваньня.

Спадзяёмся таксама, што да канца месяца здолеем сабраць 3200 рублёў, каб цалкам разьлічыцца за гэты месяц арэнды і ў сьнежні ня мець ніякіх фінансавых абавязаньняў. Будзем удзячныя ўсім, хто дапаможа сабраць рэчы і сплаціць неабходную суму», — заклікала кіраўніца ТБМ, экс-дэпутатка Палаты прадстаўнікоў Алена Анісім.

Раней Вярхоўны суд на пазоў Міністэрства юстыцыі прыняў рашэньне аб ліквідацыі арганізацыі, якая існавала з 1989 году і фактычна ад таго часу месьцілася ў менскім офісе на вуліцы Румянцава, 13.

Больш за 30 гадоў гэта быў адзін з цэнтраў нацыянальнуй культуры, дзе ладзіліся прэзэнтацыі выданьняў, праводзіліся моўныя курсы, а таксама можна было набыць беларускія газэты, кнігі, дыскі, сувэніры.

ТБМ было заснаванае дзеля падтрымкі і разьвіцьця беларускай мовы і культуры, а таксама абароны моўных правоў грамадзян.

Да красавіка 1997 году арганізацыю ўзначальваў народны паэт Беларусі Ніл Гілевіч. Затым на працягу двух гадоў арганізацыяй кіраваў паэт і дыплямат Генадзь Бураўкін. Увосень 1999-га старшынём быў абраны археоляг, гісторык архітэктуры, палітычны дзяяч Алег Трусаў.

У кастрычніку 2017 году абʼяднаньне ўзначаліла філёляг Алена Анісім, якая на той момант была дэпутаткай Палаты прадстаўнікоў Нацыянальнага сходу.

Ліквідацыя недзяржаўных арганізацый у Беларусі

У красавіку міністар замежных спраў Беларусі Ўладзімер Макей заявіў, што ў адказ на заходнія санкцыі ў Беларусі можа быць зьнішчана грамадзянская супольнасьць.

«Любое далейшае ўзмацненьне жорсткасьці санкцый прывядзе да таго, што грамадзянская супольнасьць, пра якую яны клапоцяцца, перастане існаваць. І гэта будзе, я лічу, абсалютна абгрунтавана ў дадзенай сытуацыі», — сказаў Макей.

22 ліпеня Аляксандар Лукашэнка заявіў пра зачыстку недзяржаўных арганізацый.

«Так і ўрад, і МЗС пабеглі за „дэмакратыяй“ і пастваралі ў нас (хай Макей ізноў ня прыме на свой рахунак, гэта і да яго яшчэ было, яму гэта ў спадчыну дасталася, трэба цяпер разграбаць), і мы атрымалі пад 2 тысячы на невялікую краіну НДА, НКА, бандытаў і замежных агентаў. Ну і што, дэмакратыю атрымалі?»

«Ідзе зачыстка. Вы думаеце, гэта проста? Там ужо тысячы людзей працуюць, нашых людзей, і ў асноўным з павернутымі, прамытымі за чужыя грошы мазгамі», — сказаў Лукашэнка.

30 ліпеня Лукашэнка заявіў, што «пад выглядам дабрачыннасьці некамэрцыйныя арганізацыі адпрацоўваюць чужую палітычную замову». Ён сказаў, што розных недзяржаўных фондаў, прыватных установаў, праваабарончых арганізацый у Беларусі было паўтары тысячы.

«У выніку праведзеных мерапрыемстваў выдзелена 185 дэструкцыйных структураў, якія нясуць патэнцыйную пагрозу нацыянальнай бясьпецы, у тым ліку прадстаўніцтва замежнай некамэрцыйнай арганізацыі, 71 рэспубліканскае і мясцовае грамадзкае аб’яднаньне, 113 установаў», — сказаў Лукашэнка на нарадзе з чыноўнікамі.

Зь сярэдзіны ліпеня адбываецца масавая ліквідацыя недзяржаўных арганізацыяў па ўсёй краіне. Пад пагрозай існаваньне дзясяткаў асьветніцкіх, праваабарончых, дабрачынных, спажывецкіх, дасьледчых і іншых арганізацыяў. Прадстаўнікоў установаў затрымліваюць, праводзяць у іх дома і ў офісах ператрусы, арыштоўваюць рахункі.

Паводле праваабаронцаў «Вясны», ужо ліквідавалі больш за 30 НДА, больш за 100 — у працэсе ліквідацыі ці пад яе пагрозай.

Сярод ліквідаваных арганізацый

  • • Human Constanta
  • • Беларуская асацыяцыя журналістаў
  • • Беларускі Хэльсынскі камітэт
  • • Гродна Лайф Медыя
  • • Згуртаваньне беларусаў сьвету «Бацькаўшчына»
  • • Зьвяно
  • • Имена
  • • Мова нанова
  • • Офіс па правах людзей з інваліднасьцю
  • • ПЭН-цэнтар
  • • Прававая ініцыятыва
  • • Саюз беларускіх пісьменьнікаў
  • • Тэрыторыя правоў
  • • Цэнтар прававой трансфармацыі
  • • Экадом
  • Таварыства беларускай мовы

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG