Лінкі ўнівэрсальнага доступу

Зьняволеная рэдактарка Tut.by Золатава атрымала ўзнагароду Reporter:innen-Preis 2021


Марына Золатава

Галоўная рэдактарка ліквідаванага ўладамі парталу Tut.by атрымала прэстыжную нямецкую ўзнагароду, знаходзячыся за кратамі.

Узнагароду Reporter:innen-Preis штогод уручае Форум рэпартэраў Нямеччыны. З прамовай аб Марыне Золатавай выступіла Каця Глогер, сустаршыня праваабарончай арганізацыі «Рэпартэры бязь межаў», паведамляе Беларуская асацыяцыя журналістаў.

«Гэтая ўзнагарода зьяўляецца знакам нашай глыбокай павагі да працы выдатнага журналіста. Яна ўручаецца за нязломную мужнасьць Марыны і перакананасьць у тым, што незалежная журналісцкая праца можа зьмяніць нешта да лепшага, за яе ўнёсак у дэмакратыю, якая немагчымая без свабоды прэсы», — сказала Глогер.

Марына Золатава знаходзіцца пад вартай з 18 траўня 2021 году. Яе затрымалі ў рамках крымінальнай справы, распачатай супраць Tut.by за «ўхіленьне ад выплаты падаткаў у асабліва буйным памеры» (ч. 2 арт. 243 Крымінальнага кодэкса). Праваабаронцы назвалі абвінавачаньне палітычна матываваным, а ўсіх падазраваных у справе прызналі палітвязьнямі.

Напісаць Марыне Золатавай можна па адрасе: СІЗА-1, вул. Валадарскага, 2, Менск, 220030.

Пра перасьлед Tut.by

  • 18 траўня офіс рэдакцыі быў заблякаваны за публікацыю «забароненай заканадаўствам інфармацыі», туды прыйшлі супрацоўнікі ДФР. Пазьней у ведамстве паведамілі, што на службовых асобаў завялі крымінальную справу за ўхіленьне ад выплаты падаткаў у асабліва буйным памеры. На думку сілавікоў, рэзыдэнт Парку высокіх тэхналёгій атрымаў выручку, не абумоўленую дзейнасьцю, дазволенай для рэзыдэнтаў.
  • У справе затрымалі агулам 15 чалавек: кіраўнікі, журналісты і іншы пэрсанал мэдыйнага парталу Tut.by (Людміла Чэкіна, Марына Золатава, Вольга Лойка, Ірына Рыбалка, Алена Талкачова, Анжэла Асад, Марыя Новік, Ала Лапатка, Аляксандра Дайнека, Андрэй Аўдзееў, Дар'я Данілава, Кацярына Ткачэнка і Ірына Касьцючэнка), а таксама генэральны дырэктар Hoster.by Сяргей Павалішаў (вызвалілі 1 верасьня) і ўдава заснавальніка Tut.by Юлія Чарняўская. Праваабаронцы прызналі іх палітвязьнямі.
  • Удава заснавальніка парталу Юрыя Зісера Юлія Чарняўская цяпер пад хатнім арыштам, два дні пасьля затрыманьня пра яе не было нічога вядома, яна перанесла гіпэртанічны крыз і была на нейкі час шпіталізаваная.
  • Сам сайт Tut.by заблякаваны рашэньнем Мінінфармацыі.
  • У сьнежні 2020 году Tut.by на патрабаваньне Міністэрства інфармацыі быў пазбаўлены статусу СМІ. Падставай сталі раней вынесеныя папярэджаньні да матэрыялаў аб правядзеньні прэзыдэнцкіх выбараў, дзейнасьці Камітэту дзяржаўнага кантролю, беларускай мытні і г.д.
  • Увечары 27 чэрвеня партал выдаліў з сацыяльных сетак усе допісы за апошнія паўтара года.
  • 13 жніўня Суд Цэнтральнага раёну Менску прызнаў інфармацыйную прадукцыю і сацыяльныя сеткі Tut.by і новага праекту тутбаеўцаў Zerkalo.io экстрэмісцкімі.
  • 7 кастрычніка Сьледчы камітэт паведаміў пра новую крымінальную справу супраць тутбаеўцаў — за распальваньне варожасьці, учыненае групай асобаў (ч. 3 арт. 130). Ім пагражае да 12 гадоў зьняволеньня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG