Лінкі ўнівэрсальнага доступу

У палітзьняволенай Касьцюговай памёр бацька, у Беларусі не засталося сваякоў, якія могуць яго пахаваць


Палітоляг, рэдактарка сайту «Наше мнение» Валерыя Касьцюгова.

Пра сьмерць бацькі палітзьняволенай Валерыі Касьцюговай напісала яе дачка Настасься.

Настасься Касьцюгова напісала ў твітэры:

«Сёньня памёр мой дзядуля, і ў яго фактычна няма сваякоў, якія могуць яго пахаваць. Маці ў турме, я на эміграцыі, бабуля памерла, яго сын, мой дзядзька, таксама памёр даўно. Мой бацька памірае ад раку, і ў мяне пачынаюць заканчвацца сваякі, зь якімі я магу пагаварыць».

Палітоляга і кансультантку Валерыю Касьцюгову ўжо больш за пяць месяцаў утрымліваюць у менскім СІЗА № 1 на вуліцы Валадарскага. Прашэньня аб памілаваньні яна не пісала.

53-гадовую Валерыю Касьцюгову, палітоляга, рэдактарку сайту «Наше мнение», затрымалі 30 чэрвеня 2021 году. На яе завялі крымінальную справу па першай частцы 357-га артыкула («Змова або іншыя дзеяньні, учыненыя з мэтай захопу дзяржаўнай улады»), 6-й частцы 16-га артыкула («Саўдзел у злачынстве») і 3-й частцы 361-га артыкула («Заклікі да дзеяньняў, накіраваных на шкоду зьнешняй бясьпецы Беларусі, яе сувэрэнітэту, тэрытарыяльнай недатыкальнасьці, нацыянальнай бясьпецы і абараназдольнасьці»).

Дэталі справы не разгалошваюцца, адвакат пад падпіскай аб невыдаваньні.

«Адзінае, што я магу даведацца, гэта пра дату суду, — кажа дачка палітзьняволенай Настасься Касьцюгова. — Але пакуль пра суд гаворкі няма».

Хто такая Валерыя Касьцюгова

  • Валерыя Касьцюгова — заснавальніца і шматгадовая рэдактарка сайту экспэртнай супольнасьці «Наше мнение». Таксама яна рэдактарка і ўкладальніца выданьня «Белорусский ежегодник», кіруе экспэртнай групай маніторынгу «Беларусь в фокусе».
  • «Наше мнение» — інтэрнэт-праект, які зьбірае аналітычныя думкі беларускіх і замежных экспэртаў і навукоўцаў. Там друкаваліся амаль усе вядомыя беларускія аналітыкі і палітолягі. Першы выпуск апублікаваны ў 2003 годзе.
  • Вядомы ў экспэртным асяродзьдзі «Белорусский ежегодник» быў аналітычным зрэзам таго, што адбывалася ў Беларусі. Паводле сайта nmnby.eu, у сфэры інтарэсаў Валерыі Касьцюговай былі беларуска-расейскія дачыненьні, беларускія партыі і палітычныя арганізацыі.
  • Раней Валерыя Касьцюгова працавала журналісткай у «Белорусской деловой газете».
  • Экспэрты, зь якімі пагутарыла Свабода, адзначаюць, што пазыцыі Валерыі Касьцюговай былі па-навуковаму стрыманыя і збалянсаваныя, «яна не дазваляла сабе нейкіх публіцыстычных выразаў у бок рэжыму».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG