Лінкі ўнівэрсальнага доступу

Судзяць аўтараў расейскага сайту Regnum. Дзень трэці


Суд над аўтарамі расейскага сайту Regnum. На лаве падсудных грамадзяне Беларусі Юры Паўлавец, Дзьмітры Алімкін і Сяргей Шыптэнка

Коратка

18 сьнежня ў Менскім гарадзкім судзе пачаўся працэс па справе аўтараў пракрамлёўскага інтэрнэт-рэсурсу Regnum, якіх вінавацяць у распальваньні міжнацыянальнай варожасьці. Гэта грамадзяне Беларусі Юры Паўлавец, Дзьмітры Алімкін і Сяргей Шыптэнка. Паўлаўцу і Шыптэнку таксама выстаўленае абвінавачаньне ў незаконнай прадпрымальніцкай дзейнасьці. Абвінавачаным пагражае да 12 гадоў зьняволеньня. Пры гэтым год яны ўжо адбылі ў сьледчым ізалятары КДБ.

За што судзяць аўтараў Regnum. Цытаты з артыкулаў

Што вядома пра фігурантаў справы Regnum

«Рэгнумаўцы» ў судзе: «Дыктатура перасьледуе нас па палітычных меркаваньнях»

Ці трэба саджаць за нелюбоў да Беларусі. 5 тэзаў Карбалевіча і Цыганкова

10:09 20.12.2017

Працэс аднавіўся. Сяргей Шыптэнка працягвае даваць паказаньні. Кажа, што закон не парушаў, а высновы сьледчых не пацьвярджаюцца дакумэнтамі.

10:18 20.12.2017

«Раскамнагляд» ня ўбачыў прыкметаў экстрэмізму ў матэрыялах»

Шыптэнка просіць суд патлумачыць, на падставе якіх законаў беларускія экспэрты будуць ацэньваць матэрыялы з расейскіх сайтаў, у той час як «Раскамнагляд» ня ўбачыў «парушэньняў і прыкметаў экстрэмізму ў матэрыялах сайту Рэгнум, якія разглядае сьледзтва».

10:19 20.12.2017

«Экспэрты апусьціліся да ўзроўню блогераў»

Паводле Шыптэнкі, экспэрты ніяк не даказалі нават тое, што матэрыялы з сайту пад подпісам Артур Грыгор’еў належаць ягонаму аўтарству.

«Паводле першай адукацыі я гісторык-архівіст і ведаю, што найперш трэба правесьці атрыбуцыю — высьветліць аўтарства матэрыялаў, бяз гэтага далейшая экспэртыза адразу губляе каштоўнасьць», — сказаў Сяргей Шыптэнка.

Ён таксама лічыць, што і ўся экспэртыза ненавуковая, хаця ў ёй ўжытая навуковая тэрміналёгія, яна ідэалягізаваная. «Экспэрты апусьціліся да ўзроўню блогераў», — мяркуе Шыптэнка.

10:35 20.12.2017

Пра Дуніна-Марцінкевіча

Падсудны Шыптэнка зачытаў цытаты з экспэртызы, якія тычацца ягоных артыкулаў, дзе ён пісаў пра тое, што беларускага пісьменьніка Вінцэнта Дуніна-Марцінкевіча ў выніку нібыта трэцяй хвалі прымусовай дзяржаўнай беларусізацыі неправамерна залічылі ў беларусы. Спыніўся і згадаў, што «Дунін-Марцінкевіч таксама быў вязьнем Валадаркі».

Сяргей Шыптэнка знаходзіцца ў «Валадарцы» ужо больш за год.

11:00 20.12.2017

Што пісаў пра бел-чырвона-белы сьцяг

Шыптэнка палемізуе з экспэртамі, якія аналізавалі ягоны артыкул «Этнічны нацыяналізм на ўкраінскі ўзор» і сьцьвярджалі, што аўтар у гэтым артыкуле называе беларускі народ «непаўнавартасным». Шыптэнка заўважае, што гэтак ў артыкуле не пісаў.

Асабліва «дастаецца» ад Шыптэнкі экспэрту Галіне Гатальскай. Тая пісала ў экспэртызе, што Шыптэнка «цынічна» падкрэсьліваў, што бел-чырвона-белы сьцяг выкарыстоўваўся калябарацыяністамі падчас Вялікай Айчынай вайны. Шыптэнка заўважае: тое, што сьцяг выкарыстоўваўся калябарантамі, — гэта даказвае даведка з музэю ВАВ.

Шыптэнка прызнае, што нідзе ў артыкулах не выкарыстоўваў адносна Беларусі тэрмін «сувэрэнная нацыянальная дзяржава».

11:04 20.12.2017

Суд зрабіў заўвагу Шыптэнку

Падсудны мяркуе, што экспэрты чамусьці да яго былі перадузятыя і з гэтай прычыны прапанаваў правесьці мэдычны агляд экспэрта Галіны Гатальскай ды іншых экспэртаў. На гэта судзьдзя адразу зрабіў падсуднаму заўвагу: «Давайце ня будзем чапляць чалавечыя якасьці экспэртаў».

11:06 20.12.2017

Мяркуе, што яго пасадзяць

Шыптэнка ў паказаньнях: «Мы ужо год у турме і на падставе гэтай экспэртызы нам дадуць яшчэ некалькі гадоў лягераў».

11:08 20.12.2017

«Гэта бяздоказна»

Шыптэнка назваў гіпатэтычнай выснову экспэртаў пра тое, што ягоныя артыкулы ў Расеі могуць выклікаць незадавальненьне палітыкай уладаў Беларусі, а ў Беларусі — незадавальненьне тым, як у Расеі асьвятляюць падзеі ў Беларусі і што гэта можа спарадзіць канфлікт.

«Можа, і што? Канфлікт адбыўся?» — сказаў Шыптэнка.

11:09 20.12.2017

Згадаў імя Яраслава Раманчука — калі казаў пра тое, што экспэрты чапляліся да выразаў у ягоных артыкулах:

«Той таксама ўжываў выраз „беларуская манілаўшчына“ і што? Аўтар на свабодзе».

11:20 20.12.2017

«Экспэртыза суб’ектыўная»

Падсудны Шыптэнка згадаў, што шмат разоў ён з адвакатам заяўляў адвод экспэртам, але гэта было праігнаравана. Падсудны ўсклаў адказнасьць за недакладасьць (як ён лічыць) экспэртызы і на Сьледчы камітэт. Мяркуе, што суд «ня можа прымаць за аснову ў сваім рашэньні такую суб’ектыўную экспэртызу».

Экспэрты зрабілі выснову пра варожасьць аўтара артыкулу да беларускай дзяржавы, але Шыптэнка нязгодны, што ён варожа ставіцца да Беларусі і беларусаў.

11:58 20.12.2017

Шыптэнка абвінаваціў экспэртаў у паклёпе, нязгодны, што ён асьмейваў беларускую нацыю. «Аўтар сапраўды крытыкуе, але не беларускае як такое, а беларускіх чыноўнікаў», — сказаў Шыптэнка.

12:27 20.12.2017

Шыптэнка абвінаваціў экспэртаў у паклёпе, нязгодны, што ён асьмейваў беларускую нацыю. «Аўтар сапраўды крытыкуе, але не беларускае як такое, а беларускіх чыноўнікаў» — Шыптэнка.

12:28 20.12.2017

«Эўфрасіньню Полацкую неабгрунтавана запісалі ў беларускія дзеячы»

Шыптэнка пра сябе: «Пра Эўфрасіньню Полацкую аўтар падкрэсьліваў яе „агульнарасейскасьць“, а не нацыянальнасьць. Пра нацыянальнасьць у той час, калі жыла сьвятая, казаць цяжка». Экспэрты палічылі, што Шыптэнка абвінаваціў беларускія ўлады ў тым, што Эўфрасіньню Полацкую неабгрунтавана запісалі ў беларускія дзеячы".

12:29 20.12.2017

«Экспэрты паўсюль шукаюць здраднікаў»

Шыптэнка сказаў, што экспэрты «паўсюль шукаюць здраднікаў». Сябе здраднікам ён не лічыць.

12:30 20.12.2017

Зачапіў праблему карупцыі

Шыптэнка спасылаецца на леташняе інтэрвію з генпракурорам Канюком, які сказаў, што на трэць павялічылася карупцыя. «А калі пра гэта пішуць аўтары Рэгнум, хіба гэта паклёп на беларускую дзяржаву?»

12:32 20.12.2017

Ня згодны, што «ўніжальна» ставіўся да назвы краіны, калі называў яе Белорусиией, а не Беларусьсю. «А як жа такія прыклады, як назвы газэт: „Совеская Белоруссия“, „Комсомольская правда в Белорусии“? Чаму яны застаюцца?»

13:14 20.12.2017

Шыптэнка пісаў у Regnum бясплатна

Падсудны Шыптэнка адмовіў, што атрымліваў грошы за свае артыкулы на сайце «Рэгнум». На пытаньне, чаму пагаджаўся друкавацца бясплатна, адказаў, што з-за ідэйных меркаваньняў: «Бо, як і Натальля Андрэева, я ня мог паступіцца прынцыпамі».

Прызнаў, што ведаў рэдактара аддзелу з «Рэгнум» Юрыя Баранчыка, але чаму пытаюцца толькі пра яго: «Чаму сьледчых цікавіць толькі Баранчык?»

Падсудны Шыптэнка пацьвердзіў, што карыстаўся электроннай паштовай скрыняй, якая названая ў крымінальнай справе як ягоная.

13:14 20.12.2017

У судзе перапынак да 14.00.

14:24 20.12.2017

Пасьля перапынку працэс адноўлены.

Пракурор працягвае допыт Сяргея Шыптэнкі.

Цяпер пытаньні тычацца працы падсуднага рэдактарам часопіса «Новая эканоміка»: адкуль часопіс атрымліваў грошы? Шыптэнка даводзіць, што аўтары і сябры рэдкалегіі самі дасылалі часопісу грошы, каб падтрымаць выданьне. Аўтарам за гэта гарантаваўся экзэмпляр часопісу, сябрам рэдкалегіі гарантавалася магчымасьць надрукавацца ў выданьні.

«Гэтак больш за 10 гадоў рэалізуем гэты праект безь дзяржаўнай і зьнешняй дапамогі», — сказаў Шыптэнка.

14:25 20.12.2017

Шыптэнка паведаміў суду, што знаёмы з Паўлаўцом даўно, а з Алімкіным пазнаёміўся 3 месяцы таму на Валадарцы. Адмовіўся, што дапамагаў Паўлаўцу у кантактах з рэсурсам lenta.ru.

Загрузіць яшчэ

Глядзець камэнтары (5)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG