Лінкі ўнівэрсальнага доступу

Судны дзень-2: да 15 сутак арышту. Працягваюцца суды над «недармаедамі»

Ад раніцы 14 сакавіка працягнуліся суды над удзельнікамі «Маршаў недармаедаў». Судзілі прынамсі 13 чалавек у Горадні, прынамсі 3 чалавек у Баранавічах, прынамсі 2 у Берасьці. Людзей каралі штафамі і арыштамі.


Суд над удзельнікамі акцыі недармаедаў і журналістамі ў Воршы. На фота — Вольга Севярынец і Павал Севярынец трымаюцца за рукі
21:57 14.3.2017

Праз гадзіну пасьля таго, як Аляксандра Кабанава забралі у Бярозаўскі РАУС, яго тэлефон недасяжны.

20:56 14.3.2017

Міліцыянты зь Бярозаўскага РАУС вечарам пасьля 20 гадзіны наведаліся да мясцовага актывіста Аляксандра Кабанава. Сказалі, што жадаюць дапытаць яго ў сувязі з удзелам у акцыі «Марш недармаедаў», якая была ў Берасьці 5 сакавіка.

Ад Аляксандра патрабуюць паехаць разам зь імі ў аддзел міліцыі, дзе ў яго возьмуць тлумачэньні. У сябе дома Аляксандар Кабанаў адмовіўся расказваць ім пра акалічнасьці свайго ўдзелу ў акцыі.

Напярэдадні вечарам, літаральна суткі таму, Аляксандар Кабанаў выйшаў на волю пасьля 5 дзён зьняволеньня за адміністрацыйнае правапарушэньне (хуліганства і брыдкаслоўе). Паводле актывіста, падставай для суду стала правакацыя.

20:34 14.3.2017

Актывістку зь Берасьця Паліну Шарэнду-Панасюк пакаралі штрафам у 690 рублёў (30 базавых велічыняў) за ўдзел у несанкцыянаванай масавай акцыі.

20:19 14.3.2017
19:43 14.3.2017

У Бабруйску Юрась Грынявецкі пакараны штрафам 30 базавых (690 рублёў). Юрась адзін гадуе 14-гадовую дачку. Яго зьвінавацілі ў тым, што ён заклікаў пад час акцыі: «Давайце жыць па Канстытуцыі». У судзе ён сказаў, што ня ведаў, што акцыя была несанкцыянаваная. Судзьдзя Тацяна Тарабуева на гэта сказала: калі вы сумняваецеся, санкцыянаваны мітынг ці не, то лепш ня ўдзельнічайце.

Яўген Васьковіч пакараны арыштам на 15 сутак. Ён падаў хадайніцтва, што просіць адваката. Яго павезьлі ў юрыдычную кансультацыю, а там сказалі, што, каб заключыць дамову, яго трэба вызваліць. Але судзьдзя Алена Ярмашэвіч зрабіць гэта адмовілася. Тады актывіст сказаў, што адмаўляецца ад удзелу ў працэсе.

Юрась Грынявецкі ў судзе
Юрась Грынявецкі ў судзе

19:16 14.3.2017

Інгу Судзілоўскую аштрафавалі на 15 базавых (345 рублёў) за ўдзел у мітынгу (судзьдзя Натальля Чарапуха). У якасьці доказаў міліцыя выкарыстоўвала запісы трансьляцыі Радыё Свабода. У кадры Судзілоўская казала ў мэгафон: «Чужая бяда ня можа быць чужой» і «Разам мы сіла».

Разгляд справы актывісткі Галіны Сьмірновай перанесьлі на 15 сакавіка. Да суду яна правядзе ноч у ізалятары.

Каля суду ў Бабруйску
Каля суду ў Бабруйску

19:08 14.3.2017

Як паведамляе праваабарончы цэнтар «Вясна», 14 сакавіка каля Цэнтру ізаляцыі правапарушальнікаў на вуліцы Акрэсьціна ў Менску затрымалі Марыну Насенку. Яна несла туды перадачу для Вячаслава Касінерава, які адбывае 15-сутачны арышт за ўдзел у «Маршы абураных беларусаў» у Менску 17 лютага. Пасьля затрыманьня Насенку асудзілі на 12 сутак, таксама за ўдзел у акцыі 17 лютага.

19:06 14.3.2017

Журналістаў Гатоўчыца і Шчыракову вінавацяць за «Марш недармаедаў»

Старшыня Гомельскай філіі Беларускай асацыяцыі журналістаў Анатоль Гатоўчыц выкліканы на 15 сакавіка ў Цэнтральны РАУС Гомеля. А журналістку-фрылансэрку Ларысу Шчыракову будуць судзіць 17 сакавіка ў судзе Гомельскага раёну.

18:28 14.3.2017

У Берасьці судзяць Паліну Шарэнду-Панасюк

Берасьцейскую актывістку Паліну Шарэнду-Панасюк судзяць за ўдзел у несанкцыянаванай масавай акцыі.

Паліна Шарэнда-Панасюк
Паліна Шарэнда-Панасюк

Пра гэта Свабодзе паведаміў праваабаронца Ўладзімер Вялічкін.

«Яе літаральна за рукі-ногі занесьлі ў суд. Я толькі пасьпеў даць ёй візытоўку адваката, каб яна ў судзе заявіла хадайніцтва пра неабходнасьць заключыць дамову з адвакатам. Забралі яе сёньня раніцай. За што канкрэтна будуць судзіць, ня ведаю, але, хутчэй за ўсё, за ўдзел у несанкцыянаванай масавай акцыі. Супраць яе будуць сьведчыць 4 міліцыянты», — кажа праваабаронца.

Пасьля 17-й гадзіны суд у Берасьці зачынены знутры і працуе толькі «на выхад», кажа Ўладзімер Вялічкін. Таму ніхто на суд да Паліны Шарэнды-Панасюк трапіць ня змог.

17:56 14.3.2017

Студэнтаў аштрафавалі за запрашэньні на Дзень волі

Актывісты «Моладзі БНФ» Мікалай Логвінаў і Мікіта Краснакуцкі аштрафаваныя на пяць базавых велічынь (115 руб) кожны ў Першамайскім судзе Менску.

10 сакавіка хлопцы раздавалі на тэрыторыі Менскага гарадзкога політэхнічнага каледжу стужкі зь беларускім нацыянальным арнамэнтам і запрашэньні на Дзень Волі.

Кіраўніцтва каледжу напісала заяву ў міліцыю.

14 сакавіка Мікалая і Мікіту міліцыя забрала проста з экзамэну.

Актывістам «Моладзі БНФ» інкрымінавалі «распаўсюд інфармацыі пра акцыю, якая яшчэ не дазволеная».

Мікіта Краснакуцкі
Мікіта Краснакуцкі

Мікалай Логвінаў
Мікалай Логвінаў

17:08 14.3.2017

Максім Буйніцкі з Бабруйску абвясьціў галадоўку, ужывае толькі ваду.

17:07 14.3.2017

Яўген Васьковіч хоча наняць адваката, разгляд ягонай справы, хутчэй за ўсё, адбудзецца заўтра.

16:38 14.3.2017

Максіма Буйніцкага, удзельніка пратэсту ў Бабруйску супраць «дэкрэту аб дармаедах», будуць судзіць 16 сакавіка. Яго вінавацяць па трох артыкулах — дробнае хуліганства, пашкоджаньне фасадаў будынку і арганізацыя несанкцыянаванай акцыі, якая прайшла 26 лютага.

16:38 14.3.2017

Затрымалі Ўладзімера Шанцава

Кіраўнік абласной арганізацыі Аб’яднанай грамадзянскай партыі Ўладзімер Шанцаў затрыманы 14 сакавіка ў Магілёве. Паводле дачкі актывіста, Уладзімер Шанцаў правядзе ноч у ізалятары часовага ўтрыманьня, а 15 сакавіка яго будуць судзіць. Шанцава вінавацяць у арганізацыі несанкцыянаванай акцыі 19 лютага — «Прагулкі недармаедаў».

Раней Ленінскі суд Магілёва накіраваў матэрыялы адміністрацыйнай справы супраць Уладзімера Шанцава на дапрацоўку.

Уладзімер Шанцаў
Уладзімер Шанцаў

16:24 14.3.2017

Аляксей Раманаў — штраф 46 рублёў

Аляксея Раманава з Бабруйску пакаралі штрафам у дзьве базавыя велічыні (46 рублёў), яго зьвінавацілі ў дробным хуліганстве. Прысутныя прапаноўвалі дапамогу на аплату штрафу.

Аляксея затрымалі ў ноч на 11 сакавіка і зьмясьцілі ў Першамайскі РАУС Бабруйску.

15:49 14.3.2017
15:21 14.3.2017

Верамеенка — 15 сутак, Вайцехаў — 15 базавых, Абуховіч — 25 базавых

У Ленінскім раённым судзе Горадні судзьдзя Натальля Козел прысудзіла за «Марш недармаедаў» 19 лютага сябру БХД Сяргею Верамеенку 15 сутак арышту, іншаму сябру БХД Антону Вайцехаву — штраф у 15 базавых велічыняў (345 рублёў), актывісту Аляксандру Абуховічу — 25 базавых (575 рублёў).

Сяргей Верамеенка
Сяргей Верамеенка

14:46 14.3.2017

Грыгенчы — 13 сутак, Браун — 15 базавых, Мышкевіч — 25 базавых

У Ленінскім раённым судзе Горадні cудзьдзя Алена Пятрова агучыла прысуды тром актывістам за «Марш недармаедаў» 19 лютага. Сябра АГП Ежы Грыгенчы атрымаў 15 сутак адміністрацыйнага арышту, сябра БСДП(Г) Анатоль Мышкевіч — штраф у 25 базавых велічыняў (575 рублёў), актывіст Яўген Браўн — штраф у 15 базавых (345 рублёў).

Ежы Грыгенчы
Ежы Грыгенчы

14:33 14.3.2017

Аксёнаву — 15 сутак

У Магілёве затрыманаму ўчора сябру БХД Алегу Аксёнаву прысудзілі 15 сутак арышту за парушэньне парадку арганізацыі масавых мерапрыемстваў за магілёўскі «Марш недармаедаў» 19 лютага.

Аксёнаў не прызнаў сябе вінаватым: ён заявіў, што то была ня акцыя пратэсту, а сустрэча сяброў, дзе ён зь сябрамі вымушаны быў выказаць стаўленьне да «дэкрэту пра дармаедаў» і так склалася, што людзі вакол яго падтрымалі.

Алегу Аксёнаву прысудзілі 15 сутак. На фота: крайні зьлева — Аксёнаў, крайні справа — намесьнік начальніка Ленінскага РАУС Юры Калацілкін, які сьведчыў на судзе супраць Аксёнава
Алегу Аксёнаву прысудзілі 15 сутак. На фота: крайні зьлева — Аксёнаў, крайні справа — намесьнік начальніка Ленінскага РАУС Юры Калацілкін, які сьведчыў на судзе супраць Аксёнава

​Суду ў Магілёве чакае таксама Ўладзімер Шанцаў, чыю справу 9 сакавіка адправілі на дапрацоўку.

14:09 14.3.2017

Сьпіс затрыманых: больш за 100 чалавек

Праваабарончы цэнтар «Вясна» апублікаваў сьпіс затрыманых і асуджаных у сувязі з акцыямі пратэсту апошніх дзён. На момант публікацыі ў сьпісе 101 чалавек, сьпіс абяцаюць абнаўляць, калі становяцца дакладна вядомымі новыя факты затрыманьняў і судоў.

Некаторыя ў сьпісе ўжо атрымалі штрафы, некаторыя — адміністрацыйныя арышты, астатнія затрыманыя да судоў або атрымалі позву на суд. У сьпісе людзі зь Менску, Бабруйску, Баранавічаў, Берасьця, Воршы, Гомелю, Горадні, Лунінца, Магілёва ды іншых гарадоў.

Праглядзець сьпіс >>

Загрузіць яшчэ

Глядзець камэнтары (5)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG